Hai festas que nunca se esquecen.

Durante moitos anos, aproximadamente entre os anos 80 e comezos dos 2000, o Penedo Redondo encheuse de veciñas, veciños, familias e amizades para celebrar a tradicional Festa do Deporte.

Foron días cheos de alegría, deporte, música e xogos populares. Un lugar onde grandes e pequenos compartían risas, ilusión e bos momentos.

Despois de máis de 20 anos sen celebrarse, a Asociación de Veciños quere recuperar esta tradición. Facémolo pouco a pouco, con moita ilusión e co desexo de volver xuntar a toda a xente arredor dunha festa que forma parte da nosa historia.

8 e 9 de agosto de 2026

Dous días cheos de deporte, música, gastronomía, tradición e diversión para todas as idades.

Programa

Sábado 8 de agosto

11:00 – Partido entre Barrios (Homes)
Do río para abaixo contra o río para arriba. ¡Hai partido!

12:00 – Partido entre Barrios (Mulleres)Do río para abaixo contra o río para arriba. ¡Hai partido!

13:30 – Xantar popular.

14:30 – Xanta coma un rei ou unha raíña na área recreativa.
Picaña, bocadillos de porco ao espeto e moito máis.

16:00 – Comezo dos xogos populares.

16:30 – Campionato de futbolín.

16:30 – Campionato de tute.

Durante toda a tarde tamén poderás participar no xogo da chave e noutras actividades tradicionais.

21:30 – Cea especial con bocadillos de porco ao espeto.

22:30 – Remember Night cos mellores éxitos dos anos 80, 90 e 2000, da man dos DJs Ramón Eclipse e DJ Krlos.

Domingo 9 de agosto

12:30 – Gran sesión vermú con música remember e ambiente festivo.

14:30 – Xantar de clausura con polbo á galega, acompañado doutras opcións gastronómicas para despedir a festa.

Unha festa con moita historia

A Festa do Deporte era coñecida polos seus xogos tradicionais, que durante anos fixeron gozar a xeracións enteiras.

Moitas persoas lembran con cariño actividades como:

• A chave.
• A billarda.
• Os bolos celtas.
• O clavo.
• O trompo.
• Os zancos.
• Carreiras de sacos.
• Carreiras co ovo.
• O tiro á corda.
• A volta ciclista.
• O salto do saco.
• A escalada ao pau de graxa para intentar coller o xamón.

Cada proba era unha oportunidade para participar, rir e compartir unha xornada inesquecible.

Queremos volver crear novos recordos

Esta festa non é só unha celebración deportiva.

É un lugar para reencontrarse coa familia, cos amigos e coa veciñanza.

É unha oportunidade para que as novas xeracións descubran os xogos populares cos que medraron os seus pais e avós.

É unha fin de semana para compartir, colaborar e manter vivas as nosas tradicións.

Inscríbete e forma parte desta historia

FORMULARIO DE INSCRICIÓN AOS TORNEOS

https://penedorememberfest.com/#torneos

A Festa do Deporte volve grazas ao esforzo da Asociación de Veciños e de todas as persoas colaboradoras.

Agora tócache a ti!

Participa nas actividades.

Anímate a competir.

Goza da gastronomía, da música e dos xogos populares.

Comparte a fin de semana coa túa familia e amizades.

Axúdanos a recuperar unha tradición que nunca debería desaparecer.

Os días 8 e 9 de agosto de 2026 agardámoste no Penedo Redondo.

O Penedo Redondo volve latir. Volven os xogos populares, volve o deporte e volve a ilusión. Non faltes!

• A Asociación de Veciñ@s San Tomé documenta máis de 60 alcumes tradicionais que identifican ás familias da comunidade.
• O proxecto inclúe gravacións audiovisuais con testemuños veciñais e conta co financiamento da Deputación de Pontevedra e do Concello de Salceda de Caselas.

SALCEDA DE CASELAS, [24 de Julio 2026] — A Asociación de Veciñ@s Agrícola e Cultural San Tomé de Parderrubias ten posto en marcha un proxecto destinado a recuperar, documentar e poñer en valor os alcumes tradicionais da parroquia, un dos sinais de identidade máis representativos da súa historia e do seu patrimonio inmaterial.

Na actualidade, a parroquia conserva máis de 60 alcumes que identifican ás distintas familias e que, en moitos casos, son máis coñecidos que os propios nomes de orixe. Transmitidos de xeración en xeración, estes apelativos populares forman parte da memoria colectiva local e constitúen un valioso legado cultural que a entidade veciñal busca protexer contra o esquecemento.

Documentación audiovisual e memoria oral

Para levar a cabo este traballo de campo, o técnico en audiovisuais Marcos Romero atópase realizando a documentación gráfica e audiovisual en estreita colaboración coa asociación. A través de entrevistas en profundidade ás familias de Parderrubias, estanse a recompilar testemuños sobre a orixe destes alcumes, así como vivencias, tradicións, festas, costumes e acontecementos clave da historia local.

«Os alcumes non só identifican ás familias, senón que tamén contan historias, explican a evolución da comunidade e fortalecen o sentimento de pertenza ao territorio», destacan dende a Asociación de Veciñ@s San Tomé. «Recuperar a identidade de Parderrubias a través dos testemuños dos seus veciños e veciñas supón unha oportunidade única para preservar unha parte da nosa historia que, doutro xeito, podería perderse.»

Raíces con proxección internacional

Entre os alcumes recompilados figuran algúns vinculados a liñaxes de personaxes de gran relevancia pública. É o caso de familias das que proceden figuras de proxección internacional como o actor hollywoodiense Martin Sheen ou o futbolista profesional Denis Suárez, o que amosa como estes nomes populares forman parte da historia viva e transcendente da parroquia.

Apoio institucional

O proxecto conta cun investimento total de 4.083,75 euros, financiado nun 70 % pola Deputación de Pontevedra e nun 30 % polo Concello de Salceda de Caselas. Esta colaboración entre administracións e tecido asociativo e veciñal fai posible desenvolver unha iniciativa centrada na recuperación da memoria oral.

Con esta acción, a Asociación de Veciñ@s Agrícola e Culrura San Tomé de Parderrubias reafirma o seu compromiso coa conservación da identidade e das tradicións locais, garantindo que este patrimonio inmaterial continúe vivo e sexa transmitido ás futuras xeracións, o tempo que segue apostando por actividades interxeracionáis que unan as distintas xeracións da parroquia.

Contacto de prensa:

• Entidade: Asociación de Veciñ@s Agrícola e Cultural San Tomé de Parderrubias
• Lugar: Parderrubias, Salceda de Caselas (Pontevedra)
• Correo electrónico: comunicacion@aavvparderrubias.com