A Asociación de Veciños de Parderrubias continúa a traballar na mellora da Aula Sénior, un espazo de referencia na provincia que acolle e atende ás persoas maiores da parroquia e os arredores. Actualmente, a Aula Sénior conta cunha media de 11 usuarias e usuarios anuais que se benefician dun amplo abano de actividades.

Nun recóndito lugar da parroquia de Parderrubias, no concello de Salceda de Caselas, desenvólvense diferentes actividades cognitivas e de sociabilidade que permiten ás nosas avoas e avós desfrutar das tardes nun ambiente acolledor e participativo. Estas actividades non só teñen como obxectivo a mellora das capacidades sensoriais e cognitivas, senón que tamén se converten nun importante punto de encontro, fomentando a convivencia e a creación de momentos emotivos compartidos e de loita contra a soidade non desexada.

Para levar a cabo esta iniciativa, a Aula Sénior conta cunha educadora social que acode os luns, mércores e venres en horario de 16:00 a 19:30 horas, desenvolvendo actividades orientadas a mellorar as relacións sociais e a capacidade memorística das persoas participantes.

Moitas das usuarias e usuarios manifestaban anteriormente un sentimento de soidade, agravado pola falta de mobilidade e pola dificultade para participar en encontros sociais. Grazas á Aula Sénior, as persoas maiores participan en vídeos, saídas, xogos e diferentes dinámicas que contribúen de maneira significativa á mellora do seu estado de ánimo e benestar emocional.

Ver ás nosas persoas maiores felices, activas e compartindo experiencias é, sen dúbida, o maior éxito desta iniciativa.

Para o desenvolvemento da actividade, contamos coa colaboración económica da Deputación de Pontevedra, a través dunha achega de 3.600 euros para actuacións no ámbito social que teñen permitido ampliar o horario de actuación, e do Concello de Salceda de Caselas mediante o Pacto de Estado, cunha achega de 1.500 euros. A isto súmase a contribución das persoas usuarias, cunha cota mensual de 55 euros.

Grazas a estas achegas, a Asociación de Veciños de Parderrubias pode dar continuidade ás actividades da Aula Sénior, mantendo o seu compromiso de seguir chamando a diferentes portas para garantir a continuidade e mellora deste proxecto social tan necesario para a concialiación familiar e o acompañamento dos nosos maiores.

Se tes interés en informarte sobre esta actividade ou tes algún familiar que queira asistir, podes facelo contactando co numero da asociación a través de whatsapp: +34 648 03 07 23 ou visitar a nosa WEB: https://www.aavvparderrubias.com

Esta mañán participamos no acto de conmemoración do 8M do noso concello participando na lectura do manifesto con outras asociacions e colectivos do noso Pobo. Despois escoltamos a preciosa actuación do grupo “Cantareiras de Anta”

Unha mañan que concluiu co faladoiro no que participaron moitas mulleres falando de que é posible outro xeito de facer as cousas, con respeto e en Comunidade.

Os actos continuarán esta tarde no Obradoiro social da Revolta en Parderrubias a partir das 19:30 cos actos de “Raíces e Logros’ que se iniciará co faladoiro “Mesa Redonda de emprendedoras dirigida pola secretaria da Asociación Carla Perez na que participarán mulleres da Nosa contorna que son grandes referentes de esforzo e que as fai únicas:

– Noelia Rodríguez de Carnicería O labrego.
– Natalia Rodríguez de Corisca
– Conchi Pérez. Centro de estética Conchi Perez
– Silvia Álvarez. Centro de estudos Silvia Álvarez

A continuación Selene González, Concelleira de Igualdade, contará as distintas políticas, actividades e programas que se estan a ofrecer en salceda.

A continuación a Presidenta da Asociación de Veciños de Parderrubias relatará as accions que a directiva da asociación esta a promover dentro da contorna social.

Esperámosvos a todos e a todas. Porque en Salceda riscamos o machismo!!!!

Os nosos maiores merecen toda a nosa atención e axuda, e por iso nos animamos a buscar recursos para poder dar resposta as súas demandas.

A Asociación Veciñal Parderrubias, en colaboración coa Fundación Cibervoluntarios, organiza unha serie de obradoiros dirixidos a persoas de 60 anos ou máis, co obxectivo de fomentar o uso das novas tecnoloxías e mellorar as habilidades dixitais para navegar de forma segura por internet, realizar xestións electrónicas, e comunicarse de xeito eficaz mediante as principais plataformas e aplicacións.

A programación dos obradoiros é a seguinte:

Taller 1: Iniciación ao Mundo Dixital

• Datas: Luns 24 de marzo ao Xoves 27 de marzo
• Horario: 16:30-18:30
• Modalidade: Presencial

Taller 2: Comunica con Confianza: Whatsapp e Telegram

• Datas: Luns 31 de marzo ao Xoves 3 de abril
• Horario: 16:30-18:30
• Modalidade: Presencial

Taller 3: Ocio Dixital: Apps para tempo libre

• Datas: Luns 12 de maio ao Xoves 15 de maio
• Horario: 16:30-18:30
• Modalidade: Presencial

Taller 4: A Túa Banca Dixital: Compras Seguras en Liña

• Datas: Luns 19 de maio ao Xoves 22 de maio
• Horario: 16:30-18:30
• Modalidade: Presencial

Os obradoiros terán lugar no Obradoiro Social Aula da Revolta, en Barrio Revolta número 5, en Parderrubias. Cada curso terá un límite de 16 prazas, sendo o número mínimo de participantes de 10 persoas.

As persoas interesadas en participar poderán inscribirse enviando o seu nome, apelidos e data de nacemento a través do watsapp da asociación no número: +34 648 03 07 23

Os obradoiros YoConecto son unha excelente oportunidade para mellorar a competencia dixital das persoas maiores, adaptándose a todos os niveis de coñecemento. Durante o curso, os participantes aprenderán a navegar por internet de forma segura, realizar xestións coa Administración electrónica e a banca dixital, utilizar redes sociais, videoconferencia, e descubrir aplicacións e plataformas para o ocio, a saúde e a aprendizaxe.

YoConecto é unha iniciativa da Fundación Cibervoluntarios, dentro do programa Xeración D, impulsado por Red.es, o Ministerio para a Transformación Dixital e a Función Pública e financiado polos fondos europeos Next Generation EU no marco do Plan de Recuperación, Transformación e Resiliencia.

¡Non perdas a oportunidade de mellorar as túas habilidades dixitais e conectarte ao mundo!